بقلم م/ أحمد سرحان ...
بشكل مبسط أرجو أن لا يخل بالمعنى
أعلم مسبقا أن الكلام قد يبدو قاسيا، ولكن هكذا هو الاقتصاد: كلام جاف يخلو من العواطف و يتعامل مع المجتمعات قبل الحالات الفردية... و يحاول أن يصل الى الرفاه المجتمعي أولا قبل المصالح الضيقة والحالات الخاصة
الحد الأدنى للأجور هو أدنى مبلغ من المال يتقاضاه العامل في الساعة او الشهر بحكم القانون. وقد يتحدد هذا المبلغ لتغطية أجور كل العمال أو مجموعة منهم يعملون في صناعات معينة. إلا أن قوانين الحد الأدنى للأجور كثيراً ما لا تغطي أجور الأشخاص الذين يعملون في حرف أو صناعة يملكونها، أو الأشخاص الذين يعملون موظفين في الشركات والمصانع الصغيرة. ويوضع حد أدنى غير رسمي للأجور في بعض البلدان الأوروبية من خلال الاتفاقات المتبادلة بين النقابات وأصحاب الأعمال.
مصر بقى .. الموضوع بقى عامل زي الأبناء لما يطلبوا زيادة مصروف الجيب من ابوهم عشان يجيبوا كيس شيبسي زيادة من كانتين المدرسة.. و همه لا بيشتغلوا ولا بينتجوا مايقابل هذا المصروف من اساسه
الحد الادنى للاجور هو اداة اقتصادية و ليس هدفا في حد ذاته.. يعني لو صاحب مصنع مشغل 1000 عامل بمرتب 800 جنيه، و بيدفع ضرايبهم و تاميناتهم الاجتماعية و الصحية، و انت جيت تقوله الحد الادنى هنخليه 1600 جنيه، متوقع منه ايه؟ هيرفد نص العمالة طبعا او يضرب الاسعار في اثنين و في الحالتين خراب مستعجل عليه و على البلد .. و على المستهلك في النهاية
و ممكن طبعا يتحايل على هذا الامر بتعيين العمال بدون تسجيلهم و بدون تامينات و لا ضرائب .. او عمالة مؤقته بعقود 3 شهور مثلا او اقل .. و اللي مش عاجبه يضرب دماغه في سور مجلس الشعب
الحد الادنى ليس طرفا في معادلة تكلفة المعيشة، بل في تكلفة الانتاج ..
الحد الادنى يتناسب مع انتاجية العامل و ليس سعر كيلو اللحمة
الحد الادنى هو اداة اقتصادية للتعامل مع البطالة .. ترفع الحد الادنى بدون مبرر اقتصادي يعني ترفع معدل البطالة و تزيد الركود في السوق و ممكن ترفع الاسعار كمان ..
الحد الادنى بيكون نسبة من نصيب الفرد من الناتج المحلي الاجمالي .. يعني لما الاقتصاد ينمو و يكبر الحد الادنى ينمو بالتبعية
في العالم المتقدم زي بريطانيا مثلا نلاقي ان الحد الادنى للاجور نسبته 7% من نصيب الفرد من الناتج المحلي الاجمالي
تعالى بقى نشوف نسبته كام في مصر
الناتج المحلي الاجمالي في 2009 وصل تريليون جنيه .. الاعلى في تاريخ مصر .. ثاني اكبر اقتصاد في افريقيا و الشرق الاوسط .. و تعداد السكان 80 مليون.. يعني نصيب الفرد سنويا 12,500 جنيه .. يعني شهريا 1041 جنيه و 67 قرش .. و لما نقول ان الحد الأدنى 400 جنيه، يعني النسبة 38%.. يعني الحد الادنى هو الاعلى بين كل الدول النامية .. طب ما انتو مش بتشتغلوا يا ولاد التييييت، ندفعلكو فلوس منين؟ .. النسبة دي في السعودية مثلا – و هي اكبر مصدر للنفط في العالم و عندهم يادوبك 20 مليون بني ادم – الحد الادنى 1500 ريال بنسبة 33%من الناتج المحلي الاجمالي .. نفس النسبة في الكويت .. في ليبيا بلد بترولي برضه النسبة 13% .. المكسيك جيران امريكا 13% ايضا ... هونج كونج 19% .. روسيا ايضا 19% .. جنوب افريقيا اكبر اقتصاد في افريقيا 24% .. اندونيسيا 25% .. لوكسمبرج 26% .. امريكا 33% .. ماليزيا 33% .. السويد صاحبة تاسع اكبر اقتصاد في العالم مافيش فيها اساسا قانون التحديد الحد الادنى للجور زيها زي النرويج و فنلندا و ايطاليا على سبيل المثال.. الصين ثاني اكبر اقتصاد في العالم مافيش فيها حد ادنى للاجور.. تحبوا نبقى زي اي بلد فيهم؟؟
اللي عايزين يرفعوا الحد الادنى الى 1200 جنيه – يعني اعلى من نصيب الفرد من الناتج المحلي – ازاي يعني؟ نجيب ناتج محلي منين؟ نسرق؟ طب ما السعوية الحد الادنى فيها 1500 ريال
المفاجأة بقى ان الدرجة السادسة في الحكومة – و هي اقل درجات موظفي الدولة – مرتباتهم تبدأ من 700 جنيه.. يعني اساسا من 400 جنيه .. يعني الحكومة ممكن بكره تعمل قانون يخلي الحد الادنى 700 جنيه او حتى 800 جنيه عشان العلاوات ستنضم للاساسي ، و الناس هتنبسط .. (كتبت هذا التوقع في أول العام وهو ما حدث بالفعل بالضبط فيما بعد) ... بس لما يجي واحد قطاع خاص بقى يشغل عامل نظافة مش هيرضى يدفعله تامينات او صحي او اي حاجة .. و مش هيسجله اساسا .. دي اول حاجة بينظر اليها اي مستثمر اجنبي عايز يفتح شغل في بلدك هو الاجور .. أفتح ليه مصنع في مصر لو ممكن افتح احسن منه في الهند او جنوب افريقيا او حتى االيابان .. عمال مش بتنتج و كمان ادفع لهم اكثر من قيمة عملهم؟
طيب ما نرفع الحد الادنى ل 2000 جنيه و نلغي الدعم نهائيا و كل حاجة تتباع بسعرها الحقيقي .. تمام كده؟
الهدف الاساسي لتحديد الحد الادنى هو التعامل مع فقد الوظائف و في نفس الوقت الحفاظ على التنافسية في السوق .. الاجور هي معادلة في العرض و الطلب .. عشان كده دكاترة الاسنان مثلا مرتباتهم اعلى لان تخصصهم بيوفر عدد اقل في السوق و فيه طلب متزايد عليهم ....
مع ملاحظة ان فيه دعوات متزايدة في امريكا لالغاء قانون تحديد الحد الادنى للاجور و تركها تماما للعرض و الطلب و نمو الاقتصاد لان القانون يتسبب في ارتفاع البطالة و تناقص الانتاجية و التنافسية
التمييز على أساس العمر في الاجور في كثير من الأحيان هو مكرس في القانون. على سبيل المثال، في كل من الولايات المتحدة والمملكه المتحدة.
قوانين الحد الادنى للاجور تسمح لأرباب العمل بدفع أجور أقل للعمال الشباب. كثير من قوانين الدولة والقوانين المحلية الخاصه بالحد الادنى للاجور تعكس هذه الطبقيه على أساس العمر.
اغلب الدول النامية التي سبقتنا زي ماليزيا او كوريا في السبعينات وجدت ان الحل مع مشكلة البطالة هي تغيير شروط سوق العمل يعني المطالبة بحذف الحد الأدنى للأجور، خفض تحملات التغطية الاجتماعية والضرائب، وتقليص أو حذف التعويض عن البطالة تخفيض الأجور وسعات العمل
و نظرة سريعة على الموازنة نلاقي ان اجور العاملين في الدولة تصل الى 96 مليار جنيه او ربع الموازنة .. نحبوا نخليها نصف الموازنة؟ الجهاز الحكومي فيه 7 مليون موظف بيقبض مرتبه شهريا من الدولة .. و فيه ناس بتقولك عايزين نتثبت (عشان يطلعوا اجازات بدون مرتب) و همه غالبيتهم (مش كلهم) عبارة عن بطالة مقنعة .. يقولك فيه ناس بتاخد مربتات فلكية .. طيب، كام واحد دول؟ الف واحد؟ نرفدهم جميعا و نوفر شوية .. نوفر كام؟ مليار جنيه؟ 5 مليار جنيه؟؟ طيب لسه فيه 90 مليار جنيه اجور .. نعمل فيهم ايه؟؟
و اخيرا .. يبقى السؤال: هل الحد الادنى للاجور في مصر ثابت عبر السنين؟ ام يتغير؟ هل يزيد؟ و الاجابة انه زاد و يزيد كلما نما الاقتصاد.. لازم ننظر للارقام نظرة ديناميكية تراعي تحركها و ليس استاتيكية تاخد صورة لحظية و نقعد نصوت على خيبتنا و حظنا الهباب .. المريض مازال مريضا، بس بيتعالج .. و فيه استجابة و تقدم في العلاج
الحد الادنى للأجور أداة اقتصادية و ليس هدفا في حد ذاته
د.عبدالمنعم سعيد: هل يعرف أحد ما هي النتائج الاقتصادية لوضع حد أدني وأقصي للأجور, كم سيتكلف, ومن أين سوف نأتي بالموارد, وهل هناك عائد ما علي البلاد من هذه الخطوة مثل أنها سوف تزيد العمالة أم أنها سوف تجعل البطالة تستحكم؟!
 |
| رسم بياني لعلاقة الحد الأدنى للأجور بمعدل البطالة و التشغيل |
